Sosial şəbəkələrdə Vətən Müharibəsi iştirakçısının Neftçala Rayon İcra Hakimiyyətinin qarşısında özünə xəsarət yetirməsi ilə bağlı məlumat yayılıb. İddia olunub ki, Namid Hüseynov mənzil şəraitinin yaxşılaşdırılması ilə bağlı müraciətlərinin cavabsız qalmasına görə bu addımı atıb. İddiada o da vurğulanıb ki, N.Hüseynov icra başçısının onu dinləməməsinə etiraz edib.
Bizimneftcala.info “Qafqazinfo” – ya istinadən xəbər verir ki, Neftçala Rayon İcra Hakimiyyəti bəzi kütləvi informasiya vasitələrində müharibə iştirakçısı Namid Hüseynovun İcra Hakimiyyətinin qarşısında qollarını kəsməsi ilə bağlı yaydığı məlumatlara münasibət bildirib. Qeyd olunub ki, Neftçala şəhəri M.Ə.Rəsulzadə küçəsində yaşayan Hüseynov Namid Mübariz oğlu, 44 günlük Vətən müharibəsində Füzuli, Xocavənd, Qubadlı, Zəngilan uğrunda gedən döyüşlərin iştirakçısıdır:
“Oktyabrın 26-da Rayon İcra Hakimiyyətinin başçısı və aparatının məhsul şəxslərinin iştirakı ilə Namid Hüseynov rəsmi şəkildə qəbul edilib və yaşadığı fərdi yaşayış evinin dam örtüyünün təmir olunmasını, müalicə olunması məqsədilə dərman ləvazimatının alınmasını və maddi kömək göstərilməsini xahiş edib. Müraciətinə əsasən Namid Hüseynova təyin edilmiş resept əsasında dərman ləvazimatları alınaraq verilib.
Həmin gün Namid Hüseynovun yaşadığı fərdi yaşayış evinə baxış keçirilib və dam örtüyünün yararsız olduğu müəyyənləşib. Fərdi yaşayış evinin dam örtüyü tam təmir olunub.
Rayon İcra Hakimiyyəti başçısı tərəfindən qəbul edilən Namid Hüseynov müxtəlif ərzaq dükanlarından borc müqabilində götürdüyü ərzağın pulunun ona verilməsinə kömək olunmasını da xahiş edib. Onun bu xahişi də nəzərə alınaraq, maddi yardım göstərilib.
Qeyd edək ki, İcra Hakimiyyətinə daxil olan müraciət zamanı onun müharibədə yaralanması ilə bağlı hər hansı rəsmi sənəd təqdim olunmayıb. Buna baxmayaraq, Rayon İcra Hakimiyyətinin başçısının göstərişi ilə Namid Hüseynov Rayon Mərkəzi Xəstəxanasında bütün müayinələrdən keçirilib və ona bütün lazimi tibbi xidmət göstərilib”.
Açıqlamada o da vurğulanıb ki, N.Hüseynovun İcra Hakimiyyətinin qarşısında qollarını kəsməsi barədə məlumatlar yanlışdır.
